1993an Erdi Kalean zegoen gaztetxea itxi zuen Azpeitiako Udalak. Handik urte gutxira, Gazteok Zer?! taldea sortu genuen. Beste hainbat helbururen artean, herriko gazte lokal bat lortzea zen gure nahia. Bide horretatik, herri dinamika indartsu bat martxan jartzea lortu genuen. Alkateak eta zinegotziek gure ametsak betetzen uzten ez zigutenez, beraien amesgaizto izatea erabaki genuen. Bederatzi gazteren aurkako epaiketa ere eragin zuen gatazka horrek, baina baita ere Udalak eta Gazteok Zer?! taldeak gaztetxearen inguruko elkarrizketa hastea. Negoziaketa luze baten ondoren, Udalak eraikin bat utzi zigun, eta 2005eko uztailaren 15ean inauguratu genuen gaztetxea. Ordutik, hainbat inguru eta adinetako gazteak aritu gara Azpeitia hobe baten alde lanean.