Aurizberriko gaztetxea bere garaian sendagilearen etxea zenaren eraikinean kokatzen da. Hasiera batean etxearen zati txiki bat egoteko toki gisa erabiltzen genuen, herriko kontseiluak baimenduta. 2005ean, gazte belaunaldi berri batekin, funtzionamendu aldaketa ematea erabaki genuen. Etxe guztia okupatzeaz gain, asanblada eta autogestio bidez funtzionatzen hasi ginen. Horrek, arazo ugari sortu zuen gazteen eta kontseiluaren artean. Ordutik gaur egun arte, funtzionamendua hobetzeko aldeketa eta hausnarketa ugari egin dugu.
Urtean zehar ekintza eskaintza anitza egiten dugu: kirol txapelketak, zinema, tailerrak, bazkariak, jaialdiak... Helburu nagusia da parte hartzea, kontzientzia soziala, elkarlana eta alternatiba kulturalak sustatzea. Era berean, inguruko kolektibo, erakunde eta koordinadorekin aritzen gara elkarlanean. Erronka nagusia da gure herria eta zonaldea bizirik mantentzea; horretarako, izugarrizko garrantzia ematen diogu gazteak herrian bizitzen gelditzeari.
Asanblada orokorrean hartzen ditugu erabakiak, baina lantalde desberdinen bidez funtzionatzen dugu: ekintzak eta komunikazioa, obrak, ekonomia eta zerbitzuak. Era berean, instituzioekin eta bizilagunekin harremanetan jartzeko bozeramaileak ditugu. Taldeek egin beharreko lanak asanblada orokorretan erabakitzen dira, eta horretarako deialdiak beharren arabera egiten ditugu.