2000. urtean sortu genuen Anoetako Gazte Asanblada. Lehenagotik ere existitzen zen asanblada gure herrian, eta plazan bertan zegoen udaletxe zaharreko azkeneko pisuan biltzen ziren herriko gazteak. Baina, 2000. urtean, hainbat faktorek eraginda, Udalak beste lokal bat utzi zion asanbladari, gaur egungo gaztetxea dena.
Indar handiarekin hasi ginen gaztetxean, baina 2009 inguruan beheraldi urteak izan genituen, ez genuelako asmatu belaunaldi aldaketa ongi ematen. Zorionez, azken urteetan lagun ugari sartu da gaztetxean, eta kuadrilla polita osatu dugu. Ekitaldi ugari antolatzen dugu urtean zehar, eta geldirik behintzat ez gaude!
\Asanbladaren eta gaztetxearen erronka nagusia herriko gazteen parte hartzea eta guztien arteko harremanak sustatzea da. Horrez gain, urte guztian zehar hainbat ekitaldi antolatzen jarraitzea da gure asmoa: kontzertuak, hitzaldiak, dokumentalen emanaldiak, haur jolasak… Gune autogestionatua da, eta lau kidez osatutako juntak gidatutako asanbladaren bidez kudeatzen da gaztetxea. Ostiralero biltzen gara.