Berriozarko Gazte Asanbladak bere sorreratik aldarrikatu du gazteon beharrei autogestioaren bidez erantzuteko gune propio baten beharra. Bide desberdinak jarri genituen martxan, eta Udalarekin hasitako elkarrizketak bere fruitua eman zuen: 2015ko martxoaren 28an inauguratu genuen Taupada gaztetxea, Udalak enplegu politika duinaz eta bioeraikuntza bidez eraikitako lokala.
Lokalaren kudeaketa, behin-behinean, mistoa da. Hau da, zati bat gazteok kudeatzen dugu, eta, bestean, bi pertsonez osaturiko hezitzaile talde bat dago. Hala ere, bi zatiak ez dira guztiz independenteak, azken helburua baita dena gazteok kudeatzea.
Inauguratu genuenetik erritmo bizkorrean eta gazte mordoaren parte hartzeaz jarraitzen du martxan gaztetxeak. Sei lantaldetan antolatzen gara: talde feminista, ekonomia eta azpiegitura, kirola, lantalde ekologista, aisialdia lantzen duena eta komunikazio eta kontrainformazio lantaldea. Asanblada iraunkorrak eta asanblada orokorrak egiten ditugu.
Denen artean eta parte hartze handiarekin, hainbat proiektu jarri dugu martxan denbora tarte oso laburrean: baratzea egin dugu, batukada taldea sortu dugu, altzariak egin ditugu egurra berrerabiliz eta Taupadaka fanzinea sortu dugu, besteak beste.
Hala ere, aurrera begira proiektuan gazte gehiago inplikatzea, lantalde gehiago sortzea eta autogestioan sakontzea dugu helburu.